الأحد، 26 مارس، 2017

مطبخ أمنية - مدفونة الفول الحراتي .. قوي أعصابك

إحنا بقالنا شهرين تقريباً في موسم حصاد الفول والسوق كان ومازال مليان بالفول الأخضر اللي بنسميه في مصر الفول الحراتي. في أكلة جميلة جداً كانت جدتي عطيات محمد المكاوي بتعملها لينا في الموسم ده وهي (مدفونة الفول الحراتي). هي أكلة فيها كتير من روح الريزوتو الإيطالي بس بندفن في الرز أنواع الحبوب اللي عندنا إحنا في مصر زي الفول الأخضر :) ومن غير ما نحط جبنة بارميزان عشان احنا المصريين مش عندنا ثقافة الجبنة في الطبيخ أصلاً :)
الأكلة دي بجانب إنها طعمة جداً، هي مفيدة أكتر وهتعرفوا ليه من مكوناتها ... المكونات كلها بتشتغل على تقوية الأعصاب والذاكرة وتنشيط خلايا المخ ... يلا نعلى بدماغنا شوية في وسط هذا المحيط الملوث بالأدخنة في العاصمة العزيزة :( القاهرة

 1- شبت أخضر ونقطعه
 2- نقشر الفول الحراتي ( انا مستخدمة كيلو)
3- نقشر شوية توم ( انا لسه بحب أستخدم الهون) من وقت للتاني
 4- نخرط بصلة كبيرة او بصلتين صغيرين وندبلهم في الحلة على النار من غير إضافة أي سمن أو زيت فقط برش الماء عليهم

 5- نضيف الفول ونقلبه مع البصل شوية من غير اضافة اي زيت أو سمن
 6- نضيف الشبت ونقلب برضو
 7- نضيف المية حسب أكواب الرز المستخدمة ( أنا حطيت 3 ونص كوب ماء) لأني استخدمت 2 كوب أرز ولازم المية تكون أكتر عشان الفول ياخد وقته في السوا - نضيف الملح والكمون ونسيبه يغلي غلوة
 8- نغسل الرز كويس طبعا
 9- نضيف الرز وملعقتين زيت زيتون ونهدي النار ونحط تحت الحلة العازل المعدني عشان الرز ما يتحرقش من تحت
10- هي دي مدفونة الفول ... بالهنا والشفا 

هناك تعليقان (2):